Ayushman Bharat 70 Years Scheme : केंद्रीय आरोग्य मंत्रालय ऑक्टोबर मध्ये दोन महत्त्वाचे प्रकल्प सुरू करत आहे. यापैकी एक U-WIN पोर्टल आहे, ज्याचा उद्देश लसीकरण सेवा पूर्णपणे डिजिटल करणे आहे. अलीकडेच, केंद्रीय मंत्रिमंडळाने आयुष्मान योजनेत ७० वर्षे आणि त्याहून अधिक वयाच्या सर्व वृद्धांना समाविष्ट करण्याचा निर्णय घेतला आहे, ज्याची तयारी पूर्ण झाली आहे. या दोन्ही प्रकल्पांचे उद्घाटन पंतप्रधान नरेंद्र मोदी करणार आहेत.
आयुष्मान योजना वृद्धांना आरोग्य सेवा प्रदान करेल, तर U-WIN पोर्टल मुलांच्या लसीकरणासाठी कायमस्वरूपी डिजिटल रेकॉर्ड तयार करेल. 17 वर्षांपर्यंतच्या मुलांचे अंदाजे 11 वेळा लसीकरण केले जाईल आणि मातांसाठी सुमारे 3 लसीकरणाची तरतूद असेल.
भारताने कोविड महामारीच्या काळात Co-WIN द्वारे जगातील सर्वात यशस्वी लसीकरण मोहीम राबवली होती आणि आता हेच मॉडेल लहान मुलांना लसीकरण करण्यासाठी वापरले जाईल.
काय आहे U-WIN पोर्टल
U-WIN पोर्टलच्या माध्यमातून मुलांना 12 आजारांपासून संरक्षण करण्यासाठी 27 विविध डोसमध्ये लसीकरण केले जाईल. U-WIN पोर्टल गर्भवती महिलांच्या लसीकरणाची माहिती देखील ट्रॅक करेल आणि ती माहिती 11 प्रादेशिक भाषांमध्ये उपलब्ध असेल. यात स्वयंचलित एसएमएस अलर्ट प्रणाली देखील असेल, जी नोंदणीकृत मोबाईल क्रमांकावर लसीकरणाशी संबंधित माहिती पाठवेल. उदाहरणार्थ, समजा- जर मुलाला पहिल्या महिन्यात लसीकरणाची आवश्यकता असेल, तर त्वरित एसएमएस प्राप्त होईल. या प्रणालीअंतर्गत देशाच्या कोणत्याही भागात लसीकरण करण्याची सुविधा उपलब्ध होणार आहे. स्व-नोंदणीसाठी एक पर्याय देखील असेल, ज्याद्वारे लोक स्वतःची ऑनलाईन नोंदणी करू शकतील. याशिवाय आशा वर्कर्स देखील नोंदणी करण्यासाठी मदत करतील. सर्व लसीकरणासाठी QR कोड असणारे प्रमाणपत्र देण्यात येईल.
U-WIN पोर्टल लाँच करणे हे भारतातील आरोग्य सेवा क्षेत्रातील एक महत्त्वाचे पाऊल आहे. यामुळे वृद्ध आणि लहान मुलांसाठी आरोग्य सुविधा तर वाढतीलच, पण डिजिटल इंडियाच्या दिशेने टाकलेले हे एक नवे पाऊल आहे. यामुळे देशाची आरोग्य व्यवस्था मजबूत होण्यास फार मोठी मदत होईल.
